ویب ڈیسک:بالی ووڈ کے   لیجنڈ اداکار عامر خان 60 سال کے ہوگئے اور اپنی سالگرہ پر اداکار نے ایک ایسا اعلان کردیا جس سے پوری انڈسٹری میں کھلبلی مچ گئی ہے ۔

بھارتی میڈیا رپورٹ کے مطابق اداکار عامر خان نے اپنی سالگرہ کے جشن سے خطاب  کے دوران کچھ ایسا عندیہ دیا جس سے لگتا ہے کہ وہ تیسری شادی کرنے جا رہے ہیں، عامر خان نے اپنی ایک دوست گوری سے میڈیا کو ملوایا اور بتایا کہ یہ میری 25 سال پرانی دوست ہیں، جب ہم ملے تو سنگل تھے لیکن اب ہمارے بچے جوان ہوگئے ہیں۔

بالی ووڈ اداکار عامر خان نے مزید کہا کہ اب ہم پارٹنرز ہیں اور ڈیڑھ سال سے  ایک دوسرے کے ساتھ ہیں، ہم ایک دوسرے کیلئے  بہت سنجیدہ اور پرعزم ہیں، انہوں نے یہ بھی بتایا کہ میں نے اپنی پرانی دوست گوری کو شاہ رخ اور سلمان خان سے بھی ملوایا ہے، گوری کے بارے میں  لیجنڈ اداکار نے مزید بتایا کہ گوری پروڈکشن میں کام کرتی ہیں اور میں ہر روز ان کیلئے  گانا گاتا ہوں۔

اس موقع پر عامر خان نے مشہور گانا’’کبھی کبھی میرے دل میں خیال آتا ہے‘‘ کے کچھ مصرعے بھی گائے، عامر نے فلم لگان کے اپنے مشہور کردار بھوون کا ذکر بھی کیا اور کہا بھوون کو اپنی گوری مل گئی۔

بھارتی اداکار نے میڈیا سے گفتگو میں یہ بھی کہا کہ مجھے نہیں معلوم کہ 60 سال کی عمر میں مجھے شادی شوبھا دیتی ہے یا نہیں، میرے بچے بہت خوش ہیں، میں بہت خوش قسمت ہوں کہ سابق بیویوں کے ساتھ میرے بہت اچھے تعلقات ہیں۔

خیال رہے کہ عامرخان نے رینا دتہ اور دوسری بیوی ڈائریکٹر کرن راؤ سے علیحدگی اختیار کرلی ہے اور دونوں میں سے ان کے بچے بھی ہیں۔