ویب ڈیسک:پنجاب حکومت نے منشیات کے ملزمان کیخلاف مزید سخت قوانین بنانے کا فیصلہ کر لیا۔

تفصیلات کے مطابق پنجاب کنٹرول آف نارکوٹکس سبسٹینسز ترمیمی بل 2025 اسمبلی سے منظور کر لیا گیا، بل کے تحت منشیات کے مقدمات میں ضمانت سے متعلق دفعات میں تبدیلیاں کی گئی ہیں۔

بل کے متن کے مطابق منشیات مقدمات میں عمر قید کی سزا والے ملزمان کو ضمانت نہیں دی جائے گی، اور عدالت کو دیگر جرائم میں ضمانت دینے سے قبل بھاری زرضمانت اور کیس کی نوعیت دیکھنا لازم ہو گا۔

متن میں کہا گیا ہے کہ خصوصی عدالت کے فیصلے کیخلاف اپیل لاہور ہائیکورٹ کے 2 رکنی بینچ میں سنی جائے گی، اور ہائیکورٹ کے بینچ کی نامزدگی چیف جسٹس لاہور ہائیکورٹ کریں گے۔

ترمیمی بل کا مقصد منشیات کے مقدمات میں قانونی خلا اور تاخیر کو ختم کرنا ہے، جبکہ ترمیمی قانون سے منشیات کیخلاف کارروائی مؤثر بنے گی، سیکشن 38، 39، 40، 41 اور 44 میں تبدیلیاں کی گئیں، اور سیکشن 40 میں اپیل کے نظام کو ہائیکورٹ کے 2 رکنی بینچ کے ماتحت کیا گیا۔