الیکشن کمیشن نے خیبرپختونخوا میں گورنر راج اور ہنگامی حالت کے باعث بلدیاتی انتخابات کی تیاریاں روک دی ہیں۔
الیکشن کمیشن کے مطابق گورنر راج اور ہنگامی حالت سے متاثرہ اضلاع کے علاوہ صوبے کے دیگر اضلاع میں بلدیاتی انتخابات کے لیے اقدامات شروع کیے گئے تھے۔ تاہم وفاقی حکومت نے 4 نومبر 2026 کو حکم نامہ نمبر 3 جاری کیا۔
بیان کے مطابق چیف الیکشن کمشنر سکندر سلطان راجہ کی زیرِ صدارت اجلاس میں وفاقی حکومت کے حکم نامے کا جائزہ لیا گیا۔ حکم نامے کی شق نمبر 2 کے تحت آئین کے آرٹیکل 140-اے کو معطل کیا گیا ہے۔
ترجمان نے بتایا کہ آرٹیکل 140-اے کی معطلی کا اطلاق صوبے کے دیگر تمام اضلاع پر بھی کر دیا گیا ہے۔ یہ آئینی آرٹیکل صوبوں میں مقامی حکومتوں کے قیام سے متعلق ہے۔
الیکشن کمیشن کے مطابق آرٹیکل 140-اے کی ذیلی شق 2 کے تحت بلدیاتی انتخابات کرانا کمیشن کی آئینی ذمہ داری ہے، تاہم وفاقی حکومت کے حکم نامے کے باعث خیبرپختونخوا کے باقی اضلاع میں بھی انتخابات کا انعقاد ممکن نہیں رہا۔
الیکشن کمیشن نے خیبرپختونخوا میں بلدیاتی انتخابات کے لیے اب تک کیے گئے تمام اقدامات آئندہ احکامات تک روک دیے ہیں۔