ایک نیوز: عالمی یومِ صحت کے موقع پر وزیراعظم محمد شہباز شریف کا پیغام میں کہنا تھا کہ صحت کے عالمی دن کے موقع پر، ہم سب کے لیے صحت اور فلاح و بہبود کے اپنے قومی عزم کی توثیق کرتے ہیں۔ 

وزیراعظم نے کہا کہ اس سال کا تھیم "صحت مند آغاز، امید افزا مستقبل"، زچگی اور نوزائیدہ بچوں کی صحت کی اہمیت کو اجاگر کرتا ہے، ماؤں اور بچوں کی صحت، صحت مند خاندانوں، مستحکم برادریوں اور ایک پُرامید قوم کی بنیاد ہے، جو سب کے لیے روشن مستقبل کی ضمانت فراہم کرتی ہے، پاکستان نے ماں اور بچے کی صحت کے میدان میں قابلِ ذکر پیش رفت کی ہے، تاہم ہمارے سامنے اب بھی طویل سفر باقی ہے۔

انہوں نے کہا کہ ہمیں اپنے نظامِ صحت کو اس انداز میں مستحکم کرنا ہوگا کہ وہ نہ صرف طبی، بلکہ ان وسیع تر معاشرتی عوامل سے بھی مؤثر انداز میں نمٹ سکیں جو زچگی اور نوزائیدہ بچوں کی صحت پر اثر انداز ہوتے ہیں، ہماری حکومت، صحت کے شعبے میں جدید ٹیکنالوجی کو بروئے کار لانے اور مضبوط شراکت داری کے قیام کے لیے پرعزم ہے، تاکہ صحت عامہ کی سہولیات میں مزید بہتری لائی جا سکے۔

شہبازشریف نے کہا کہ ڈیجیٹل ہیلتھ ٹولز کے استعمال، ڈیٹا پر مبنی پالیسی سازی اور کمیونٹی کی مؤثر شمولیت کے ذریعے ہم اس خلا کو پُر کرنے کے متمنی ہیں جو خاص طور پر کم سہولت یافتہ اور دور دراز علاقوں میں صحت کی خدمات کی فراہمی میں حائل ہیں،عالمی یومِ صحت 2025 مناتے ہوئے، آئیے ہم صحت کے لیے ایک مربوط اور کثیر شعبہ جاتی نقطہ نظر کی ضرورت کا اعادہ کریں۔

وزیراعظم نے کہا کہ اس میں صحت کی دیکھ بھال، تعلیم، غذائیت، ماحول اور نظم و نسق میں مربوط اور عملی اقدامات شامل ہونے چاہییں، ہمیں احتیاطی تدابیر پر مبنی صحت کی دیکھ بھال، یونیورسل ہیلتھ کوریج، دماغی صحت کی بہتری، اور صحت سے متعلق عدم مساوات کے خاتمے کو اپنی ترجیحات میں شامل کرنا ہوگا۔

 ہمارا ہدف یہ ہونا چاہیے کہ ہر فرد کو معیاری صحت کی سہولیات، تربیت یافتہ طبی عملہ، محفوظ علاج اور ضرور ی ادویات بروقت اور بلا مالی رکاوٹ فراہم ہوں جب اور جہاں بھی ان کی ضرورت ہو۔