ویب ڈیسک:امریکی ریاست کیلیفورنیا کے شہر لاس اینجلس میں خالصتان کے قیام کیلئے  ہونیوالے  ریفرنڈم میں ووٹنگ کا سلسلہ کامیابی سے  مکمل  ہو گیا۔

غیر ملکی میڈیا کے مطابق بھارتی پنجاب کو خالصتان بنانے کیلئے 35 ہزار سے زائد سکھوں نے ووٹنگ میں حصہ لیا، امریکا بھر سے سکھ کمیونٹی بڑی تعداد میں ووٹ دینے کیلئے  لاس اینجلس پہنچی اور سوک سینٹر میں صبح 9بجے سے شروع ہونیوالی  ووٹنگ میں بھرپور شرکت کی۔

ووٹنگ کے اختتام پر سکھ فار جسٹس کے رہنما گرپتونت سنگھ پنوں نے اپنے خطاب  کے دوران  اگلا خالصتان ریفرنڈم 17 اگست کو واشنگٹن ڈی سی میں کرانے کا اعلان  کیااور اس ریفرنڈم کے انعقاد  کرنے کی اجازت دینے پر ٹرمپ انتظامیہ کا شکریہ ادا کیا ہے۔

گرپتونت سنگھ پنوں  نے کہا کہ دنیا بھر میں سکھ اپنے ووٹوں کے ذریعے  ہندوستان  کو واضح پیغام دے رہے ہیں کہ بھارت کے زیر تسلط نہیں رہنا چاہتے، بھارت کی گولیوں کا جواب ووٹوں سے  دینگے۔

ریفرنڈم کے دوران سکھ رہنماؤں نے میڈیا سے گفتگو کرتے ہوئے کہا کہ اب وقت آچکا ہے کہ سکھ اپنی آزاد ریاست قائم کریں۔

انہوں نے بھارتی حکومت پر شدید تنقید کرتے ہوئے کہا کہ بھارتی وزیر اعظم نریندر مودی کی حکومت امریکا، کینیڈا اور دیگر ممالک میں سکھوں پر قاتلانہ حملوں میں ملوث ہے لیکن ان حملوں کے باوجود خالصتان تحریک کو روکنا  نا ممکن ہو گا۔

سکھ رہنماؤں کا کہنا تھا کہ بھارتی پنجاب کو خالصتان بنانے کیلئے  35 ہزار سے زائد سکھوں نے ووٹنگ میں حصہ لیا ہے جو اس تحریک کی طاقت کا غماز ہے۔