ایک نیوز: آئی ایس پی آرکے مطابق آرمی چیف جنرل عاصم منیرکی زیر صدارت 268 ویں کور کمانڈر کانفرنس منعقد ہوئی۔
پاک فوج کے شعبہ تعلقات عامہ (آئی ایس پی آر ) کے مطابق فورم کے شرکا نے شہدا کے ایصالِ ثواب کیلئے فاتحہ خوانی کی، شرکا نے مادرِ وطن کے امن و استحکام کیلئے شہدائے افواج ِ پاکستان ، قانون نافذ کرنیوالے اداروں اور شہریوں کی لازوال قربانیوں کو خراجِ عقیدت پیش کیا۔
آئی ایس پی آر کے مطابق فورم کو خطے کی موجودہ صورتحال، قومی سلامتی کو درپیش چیلنجز اور بڑھتے ہوئے خطرات کے جواب میں پاکستان کی حکمتِ عملی بارے جامع بریفنگ دی گئی۔
کانفرنس میں علاقائی اور داخلی سلامتی کی صورتحال کا تفصیلی جائزہ بھی لیا گیا، فورم نے ہرقیمت پر بلاتفریق دہشتگردی کو ختم کرنے کے عزم کا اعادہ کیا۔
فورم نے اس عزم کا اعادہ بھی کیا کہ پاکستان کو غیر مستحکم کرنے کی کوشش کرنیوالے ملک دشمن عناصر، سہولت کاروں اور ان کی حوصلہ افزائی کرنے والوں کے خلاف ریاست پوری طاقت سے نمٹے گی۔
کورکمانڈرز کانفرنس میں اس عزم کا اعادہ کیا گیا کہ کسی کو بھی بلوچستان میں امن میں خلل ڈالنے کی اجازت نہیں دی جائے گی، بلوچستان کے استحکام اور خوشحالی میں خلل ڈالنے والے مذموم سیاسی مفادات اور سماجی عناصر کو بلوچستان کے عوام کی غیر متزلزل حمایت سے فیصلہ کن طور پر ناکام بنایا جائے گا۔
شرکا ءکانفرنس کے مطابق بلوچستان میں تمام ملکی اور غیر ملکی عناصر کا اصل چہرہ، گٹھ جوڑ اور انتشار پھیلانے اور پروان چڑھانے کی کوششیں پوری طرح سے بے نقاب ہو چکی ہیں، ایسے عناصر اور ایسی کوششیں کرنے والوں کو کسی بھی قسم کی معافی نہیں دی جائے گی۔
آئی ایس پی آر کے مطابق فورم نے نیشنل ایکشن پلان کے دائرہ کار کے تحت "عزمِ استحکام" کی حکمتِ عملی کے تیز اور مؤثر نفاذ کی ضرورت پر زور دیا، فورم نے دہشتگردی کے خلاف پوری قوم کے تعاون سے مشترکہ نقطۂ نظر کی اہمیت کو بھی اُجاگر کیا۔
شرکاء کانفرنس نے اعادہ کیا کہ "ریاستی ادارے آئین کے دائرے میں رہتے ہوئے قانون پر پوری استقامت سے عمل درآمد کریں گے، قانون کی عملداری میں کسی قسم کی نرمی اور کوتاہی نہیں برتی جائے گی۔
آرمی چیف جنرل سید عاصم منیر نے پاکستان بھر میں نیشنل ایکشن پلان کے تحت قائم شدہ ضلعی رابطہ کمیٹیوں کے آغاز کو بھی سراہا، آرمی چیف نے بغیر کسی رکاوٹ کے نیشنل ایکشن پلان کے تیز نفاذ کی ضرورت پر بھی زور دیا۔
آرمی چیف نے کہا کہ نیشنل ایکشن پلان کے نفاذ میں حکومتی ہدایات کے مطابق تمام ادارے پائیدار ہم آہنگی، مربوط کوششوں اور تعاون کو یقینی بنائیں۔
پاک فوج کے سپہ سالار نے کہا کہ "پاک فوج حکومت اور قانون نافذ کرنے والے اداروں کو دہشتگردوں کی مالی اعانت کیخلاف سخت قانونی اقدامات میں مکمل تعاون فراہم کرے گی۔
جنرل سید عاصم منیر نے کہا کہ غیر قانونی سر گرمیاں دہشتگردی کی مالی معاونت سے اندرونی طور پر جڑی ہوئی ہیں، پاکستان میں دہشتگردوں اور ان کے سہولت کاروں کیلئے کوئی جگہ نہیں ہے۔
فورم نے بھارت کی غیر قانونی طور پر مقبوضہ جموں و کشمیر میں انسانی حقوق کی جاری سنگین خلاف ورزیوں پر گہری تشویش کا اظہار کیا اور لائن آف کنٹرول پر بھارتی فوج کی بلا اشتعال جنگ بندی کی خلاف ورزیوں پر بھی خدشات ظاہر کئے۔
کورکمانڈرز کانفرنس نے بھارت کے غیر قانونی طور پر مقبوضہ جموں و کشمیر کے عوام کے منصفانہ حقوق کیلئے پاکستان کی پُر زور اور غیر متزلزل حمایت پر زور دیا۔
فورم نے عالمی سطح پر مقبوضہ جموں و کشمیر میں جاری انسانی حقوق کی خلاف ورزیوں کو اجاگر کرنے کیلئے مستقل سفارتی کوششوں کی ضرورت پر بھی زور دیا۔
ترجمان پاک فوج کے مطابق شرکا کانفرنس نے فلسطین کے عوام کے ساتھ مکمل یکجہتی کا اظہار کرتے ہوئے غزہ میں ہونے والی سنگین انسانی حقوق کی خلاف ورزیوں اور جنگی جرائم کی شدید مذمت کی۔
فورم نے فلسطین کے عوام کی غیر متزلزل سفارتی، سیاسی اور اخلاقی حمایت فراہم کرنے کا اعادہ بھی کیا۔
ترجمان پاک فوج کے مطابق کانفرنس کے اختتام پر آرمی چیف جنرل سید عاصم منیر نے فیلڈ کمانڈرز کو آپریشنل تیاری اور پیشہ ورانہ مہارت کے اعلیٰ ترین معیارات کو برقرار رکھنے کی ہدایت کی۔
آرمی چیف نے بہترین جنگی تیاریوں کو برقرار رکھنے کیلئے سخت تربیت کو یقینی بنانے پر بھی زور دیا۔
