ویب ڈیسک:صدر مملکت آصف علی زرداری اور وزیراعظم  محمد شہباز شریف نے قوم کو عیدالفطر کی مبارک باد  پیش کی ہے۔ 

صدر مملکت  آصف زرداری نے عید الفطر کے موقع پر اپنے پیغام میں کہا کہ میں پوری قوم اور عالم اسلام کو عید الفطر پر دلی مبارکباد  پیش کرتا ہوں، خوشی کا یہ دن ہمیں رمضان المبارک کی برکتوں، عبادات اور تقویٰ کے سفر کے بعد نصیب ہوتا ہے،عیدالفطر اللہ تعالیٰ کا انعام ہے جو  ہمیں روزے کی مشقت  پر عطا کیا  گیا  ہے۔

 انہوں نے کہا کہ اس موقع پر میں اہل مقبوضہ جموں و کشمیر کیلئے  بھی دعا گو ہوں کہ اللہ تعالیٰ انہیں جلد آزادی کے ساتھ عید نصیب فرمائے،انہوں نے کہا کہ میری اللہ تعالیٰ سے دعا ہے کہ اللہ تعالیٰ ہمارے روزے اور عبادات قبول فرمائے اور پاکستان کو امن اور خوش حالی کی راہ پر ڈال دے۔ آمین!

وزیراعظم محمد  شہباز شریف نے اپنے پیغام میں قوم کو عیدالفطر کی مبارکباد دیتے ہوئے کہا کہ یہ دن ہمیں خوشی اور ہمدردی کا درس دیتا ہے، رمضان المبارک میں ہمیں تقویٰ، صبر اور قربانی کی تربیت ملی، جسے ہمیں اپنی زندگیوں میں جاری رکھنا  چاہئے  اور اسلامی اصولوں پر کاربند رہنا  چاہئے۔

انہوں نے کہا کہ  ملک  کو اس وقت اندرونی اور بیرونی خطرات لاحق ہیں، ہمیں ہر قسم کی انتہا پسندی، نفرت اور فرقہ واریت سے بچنا اور ملکی سالمیت و استحکام کیلئے  متحد ہونا  پڑے گا۔

 انہوں نے مزید کہا کہ  پاکستان اس وقت دہشتگردوں  کیخلاف  جنگ لڑ رہا ہے، اس موقع پر ہم ان تمام شہدا کے درجات کی بلندی کیلئے  دعاگو ہیں جنہوں نے ملک کی حفاظت کیلئے  جانیں قربان کیں، ان کے اہل خانہ کے ساتھ یکجہتی کا اظہار کرتے ہوئے وزیراعظم نے کہا کہ قوم ان کے غم میں برابر کی شریک ہے اور دعاگو ہے کہ اللہ تعالیٰ انہیں صبر جمیل عطا فرمائے۔