ایک نیوز: وزیراعظم   محمد شہباز شریف نے کہا ہے کہ  معدنی وسائل کے استعمال سے پاکستان آئی ایم ایف کو خیر  باد کہہ سکتاہے۔

تفصیلات کے مطابق پاکستان منرل انویسٹمنٹ فورم 2025  اسلام آباد میں منعقد ہوئی، جس میں مختلف ممالک کے  مندوبین نے شرکت کی۔

فورم سے  خطاب کے دوران  وزیراعظم شہباز شریف  نے کہا کہ  تمام مندوبین کو پاکستان آمد پر خوش آمدید کہتا ہوں، فورم کے انعقاد پر تعاون کیلئے آرمی چیف کا شکریہ ادا کرتا ہوں،وزیر توانائی و دیگر منتظمین کی کاوشیں قابل ستائش ہیں۔

انہوں نے کہا   سی ای او بیرک گولڈ مارک برسٹو کو ڈھائی سال سے جانتا ہوں، فورم کے انعقاد پر سرمایہ کاروں کے اعتماد میں اضافہ ہوگا، فورم معدنیات کے شعبے میں سرمایہ کاری میں اضافے کا باعث بنے گا،ریکوڈک منصوبے پر پیش رفت حوصلہ افزا ہے۔

وزیراعظم نے کہا   کہ  اللہ نے پاکستان کو قدرتی وسائل سے مالا مال کر رکھا ہے، خیبرپختونخوا، بلوچستان اور گلگت بلتستان کے پہاڑوں میں معدنیات کے ذخائر ہیں، سندھ اور پنجاب کی سرزمین بھی قدرتی وسائل سے مالا مال ہے،آزاد کشمیر میں بھی قدرت کے بے پناہ خزانے مدفن ہیں،پاکستان میں معدنی ذخائر کھربوں ڈالر کے ہیں،معدنی ذخائر سے مستفید ہو کر پاکستان قرضوں کے چنگل سے آزاد ہو سکتا ہے۔

انہوں نے کہا   کہ  بلوچستان میں کان کنی سے روزگار کے مواقع پیدا اور سماجی ومعاشی ترقی ہوگی، پاکستان میں دنیا کے سب سے بڑے کوئلے کے ذخائر موجود ہیں،سندھ حکومت کوئلے کے ذخائر سے استفادہ  حاصل کرنے کیلئے بھرپور کام کر رہی ہے، پاکستان مقامی کوئلے پر انحصار کر کے قیمتی زرمبادلہ کی بچت کر رہا ہے۔

محمدشہباز شریف نے کہا   ہم نے اپنی مصنوعات کی ویلیو ایڈیشن کر کے برآمدات کو فروغ دینا ہے، خام مال کی بجائے تیار شدہ مصنوعات کی برآمد کو یقینی بنایا جائے گا، خلیجی ممالک،چین، یورپ،امریکا سمیت دیگرخطوں سے سرمایہ کاروں کو خوش آمدید کہتے ہیں،سرمایہ کاروں سے کہوں گا کہ وہ تیار مصنوعات پر کام کریں، کان کنی کی صنعت کے لئے فنی تربیت لازم وملزوم ہے،نوجوانوں کو فنی تربیت کیلئے نجی شعبے اور حکومتی سطح پر شراکت داری کو فروغ دیا  جائے گا، سرمایہ کار کمپنیاں نوجوانوں کو ہنر کی فراہم میں کردار ادا کریں۔

انہوں نے مزید کہا کہ ہم مل کر پاکستان کو دنیا کا عظیم ملک بنائیں گے، طے پانے والی مفاہمتی یادداشتوں کو معاہدوں میں تبدیل کریں گے۔