ایک نیوز:آئی ایس پی آر کے مطابق آٹھویں انٹرنیشنل پاکستان آرمی ٹیم سپرٹ مقابلوں کا اختتام ہو گیا۔
مقابلے14سے18اپریل تک کھاریاں گیریژن میں منعقد ہوئے،مقابلوں میں آرمی چیف جنرل عاصم منیر نے اختتامی تقریب میں بطور مہمان خصوصی شرکت کی۔
آئی ایس پی آرکا کہنا تھا کہ 60گھنٹے طویل پٹرولنگ مشق کا مقصد جدید جنگی مہارتوں کو بڑھانا تھا، مشق میں پاک ا فواج کی 7،بحریہ کی ایک اور دوست ممالک کی 15ٹیموں نے حصہ لیا ،مشق میں بحرین،بیلاروس،چین،سعودی عرب،مالدیپ کی ٹیموں نے شرکت کی۔
آئی ایس پی آر کا کہنا تھا کہ بنگلا دیش،مصر،جرمنی،کینیا،میانمار اور تھائی لینڈ کے نمائندوں نے بطور مبصر مشق کا مشاہدہ کیا، مشق پنجاب کے نیم پہاڑی علاقوں میں کی گئی،مشق دوست ممالک کیلئے پیشہ ورانہ اور مسابقتی فوجی سرگرمی کی حیثیت اختیار کر چکی ہے۔
آرمی چیف کا اختتامی تقریب سے خطاب میں کہنا تھا کہ شرکاء کی پیشہ ورانہ مہارت، جسمانی و ذہنی استقامت اور اعلیٰ اخلاقی معیار کی تعریف کرتا ہوں،اس قسم کی مشقوں سے ایک دوسرے سے سیکھنے کا موقع ملتا ہے،پیٹس ہمیشہ پیشہ ورانہ فوجی صلاحیتوں اور جنگی فہم و فراست کو یکجا کرتے ہوئے ہر سپاہی میں درکار ٹیم اسپرٹ کو فروغ دیتا ہے۔
آرمی چیف نے کہا کہ پاک فوج نے ہمیشہ \"کردار، جرات اور مہارت\" جیسی سپاہیانہ خصوصیات کو برقرار رکھا ہے، پاک فوج کے جوانوں نے بے مثال سپاہیانہ خصوصیات کا مظاہرہ دہشت گردی کے خلاف جنگ میں بخوبی کیا،  آرمی چیف نے مشق کے شرکاء میں انفرادی اور ٹیم کی سطح پر ایوارڈز تقسیم کیے۔
 بین الاقوامی مبصرین اور شریک ممالک کے دفاعی اتاشیوں نے بھی تقریب میں شرکت کی۔