ویب ڈیسک:اے آئی کے بعد ٹیکنالوجی کی دنیا میں انقلاب برپا ہو چکا ہے،کسی بھی ٹیکنالوجی کے جہاں فوائد ہیں وہاں نقصان بھی ہوتے ہیں جس سے سوشل میڈیا صارفین کو مشکلات کا سامنا کرنا پڑتا ہے ۔
اگر آپ گوگل کی جی میل سروس استعمال کرتے ہیں تو اب آپکو اپنا اکاؤنٹ فوری اپگریڈ کر لینا چاہیے، گوگل نے اپنے صارفین کےلئے الرٹ جاری کیا ہے کیونکہ جی میل اکاؤنٹس کو نشانہ بنانے والے فشنگ حملوں میں تیزی سے اضافہ ہو رہا ہے۔
مصنوعی ذہانت اے آئی کیوجہ سے حملوں کا انداز بدل گیا ہے جن کوشناخت کرنا انتہائی مشکل ہو گیا ہے، ماہرین کا کہنا ہے کہ صارفین کو اپنے اکاؤنٹس کی حفاظت کے لئے فوری اقدامات کرنے کی ضرورت ہے۔
سائبر سکیورٹی کمپنی کے مطابق گوگل اس وقت فشنگ حملوں سے متاثر ہونے والی سب سے بڑی ٹیکنالوجی کمپنی ہے جبکہ دوسرے نمبر پر مائیکرو سافٹ ہے،ان حملوں کے ذریعے جی میل صارفین سے لاگ ان کی تفصیلات لی جاتی ہیں، اے آئی کی وجہ سے 2025 میں یہ حملے زیادہ جدید ہوتے جا رہے ہیں۔
گوگل نے صارفین پر واضح کیا ہے کہ وہ ان کو پاس ورڈ دوبارہ ترتیب دینے یا سکیورٹی کے مسائل حل کرنے کے لئے کبھی کال یا ای میل نہیں کریگا، اگر کوئی اسکا دعویٰ کرتا ہے اور لاگ ان کی معلومات طلب کرتا ہے تو یہ ایک دھوکہ ہوگا۔
کمپنی کا کہنا ہے کہ جی میل اکاؤنٹ کی حفاظت کا ایک طریقہ پاس کیز کو اپگریڈ کرنا ہے، پاس ورڈز کے برعکس پاس کیز مضبوط تحفظ فراہم کرتی ہیں اور آپ کو اپنے فنگر پرنٹ، فیس سکین یا ڈیوائس لاک کا استعمال کر کے سائن ان کرنے کی اجازت دیتی ہیں۔
گوگل اب بھی پاس ورڈز کو بیک اپ کے طور پر استعمال کرنے کو کہتا ہے،سکیورٹی ماہرین اور ایف بی آئی نے خبردار کیا ہے کہ سکیورٹی کے روایتی طریقے ان خطرات کو کم نہیں کر سکتے۔