ویب ڈیسک: وزیراعلیٰ پنجاب نے کہا ہے کہ  آج  پاکستان کی  معیشت بہتر اور مہنگائی کم ہورہی ہے۔

تفصیلات کے  لاہور کے الحمرا ہال میں پنجابی کلچر ڈے کی تقریب سے خطاب کے دوران مریم نواز کا کہنا تھا کہ پنجاب ایک خوبصورت صوبہ ہے، پنجابی بولنے والوں کو اپنی زبان پر فخر ہونا  چاہئے ، مجھے بھی پنجابی ہونے پر فخر ہے۔

انہوں نے کہا کہ مجھے پنجاب کی مٹی اور کلچرسے محبت ہے، مشرف دور میں ہمیں ملک سے جانا پڑا، اس وقت بھی ہمیں اپنے وطن کی بہت یاد آتی تھی، پنجاب کی ثقافت میرے دل کے قریب ہے۔

وزیراعلیٰ پنجاب کا کہنا تھا کہ 30سال بعد ملک میں ہارس اینڈ کیٹل شو کا انعقاد ہوا، کوئی بھی گانا سن لیں لیکن بھنگڑے کا کوئی متبادل نہیں ہے۔

مریم نواز نے کہا کہ مخالفین ملک ڈیفالٹ کرنے کی باتیں کررہے تھے، اب سٹاک مارکیٹ روزانہ کی بنیاد پر اوپر جا رہی ہے، ملک کے حالات بہت بہتر ہو رہے ہیں اور باہر سے سرمایہ کاری بھی آرہی ہے، مہنگائی میں کمی اور بجلی کی قیمتوں کے متعلق گفتگو کی جارہی ہے۔

ان کا مزید کہنا تھا کہ ہسپتالوں میں عوام کوصحت کی بہتر سہولتیں فراہم کر رہے ہیں، فنکاروں کیلئے  جلد اقدامات کا اعلان کریں گے، دعا ہےکہ ہمارا پنجاب ہمیشہ ہنستا اوربستا رہے میری پوری کوشش ہوتی ہے آٹے کی قیمت کم رہے، حکومت عوام کوریلیف فراہمی  کیلئے ہرممکن اقدام کر رہی ہے۔

 اس سے قبل وزیراعلیٰ پنجاب نے تین روزہ پنجابی کلچر ڈے کا افتتاح کیا ، افتتاحی تقریب میں ملکی فنکاروں اور اعلیٰ شخصیات نے بڑی تعداد میں شرکت کی۔

علاوہ ازیں مریم نواز نے افتتاح کے موقع پر الحمرا ہال میں لگائے گئے ثقافت کے رنگوں سے سجے سٹالز کا بھی معائنہ کیا۔