ویب ڈیسک:صوبائی وزیر اطلاعات عظمیٰ بخاری کا کہناہے کہ  پنجاب پولیس  کی جانب سے بانی پی ٹی آئی کی بہنوں سمیت کسی خاتون کو گرفتار نہیں کیا گیا۔

تفصیلات کے مطابق وزیراطلاعات پنجاب عظمیٰ بخاری کا کہنا تھا کہ علیمہ خان اور اس کے ساتھی خود پولیس وین میں بیٹھے اور خود ہی سروس سٹیشن پر اتر گئے، بشریٰ بی بی جیل میں بی کلاس ملنے کے باوجود بہترین سہولیات مانگ رہی ہے۔

 انہوں  نے کہا کہ سوشل میڈیا اور فوٹیج کے ذریعے عوام کے سامنے اس ڈرامہ بازی  کی حقیقت کھل کر سامنے آچکی ہے، فسادی ٹولے کا یہ سب کچھ بانی پی ٹی آئی سے جھوٹی ہمدردیاں سمیٹنے کیلئے  ایک فلاپ شو تھا۔

وزیراطلاعات پنجاب نے کہا کہ سابق خاتون اول بشریٰ بی بی نے جیل میں بی کلاس کی سہولیات کے باوجود مزید سہولیات  کا مطالبہ کیا ہے، بانی پی ٹی آئی شاہانہ انداز میں جیل کاٹ رہے ہیں۔

 ان کا مزید کہناتھا کہ  تحریک انصاف کے کارکن خود اپنی قیادت کی فسادی سیاست سے تنگ آچکے ہیں، ایک طرف معافیاں  مانگ رہے ہیں  دوسری طرف سازشیں کرتے ہیں، پہلے کارکن سڑکوں پر ذلیل ہوتے تھے جبکہ لیڈرشپ انقلاب فرام ہوم لاتی تھی،  لیکن  اب یہ سلسلہ ختم ہو چکا ہے۔