ایک نیوز:آئی ایس پی آر کے مطابق 6 مئی 2025 کو بھارتی پراکسی، نام نہاد ’بلوچ لبریشن آرمی‘ سے تعلق رکھنے والے دہشت گردوں نے ضلع کچھی کے عام علاقے مچھ میں سیکیورٹی فورسز کی گاڑی کو دیسی ساختہ بم سے نشانہ بنایا،جس کے نتیجے میں پاک فوج کے 7بہادر سپوتوں نے شہادت کو گلے لگالیا۔

پاک فوج کے شعبہ تعلقات عامہ (آئی ایس پی آر ) کے مطابق شہداء میں صوبیدار عمر فاروق (عمر 42 سال، رہائشی کراچی)، نائیک آصف خان (عمر 28 سال، رہائشی ضلع کرک)، نائیک مشکور علی (عمر 28 سال،رہائشی ڈسٹرکٹ اورکزئی)، سپاہی طارق نواز (عمر 26 سال، ضلع لکی مروت کا رہائشی)، سپاہی واجد احمد ( 28 سال؛ ضلع لکی مروت کا رہائشی)، سپاہی محمد عاصم (عمر 22 سال، رہائشی ضلع کرک) اور سپاہی محمد کاشف خان (عمر 28 سال، ضلع کوہاٹ کا رہائشی) شامل ہیں۔   

آئی ایس پی آر کے مطابق علاقے میں موجود کسی بھی دہشت گرد کو ختم کرنے کے لیے  کلیئر نس آپریشن جاری ہے، اس گھناؤنے اور بزدلانہ فعل کے مرتکب افراد کو انصاف کے کٹہرے میں لایا جائے گا۔

آئی ایس پی آر  نے  کہا ہے کہ  پاکستان کی سکیورٹی  فورسز قوم کے شانہ بشانہ بلوچستان کے امن، استحکام اور ترقی کو سبوتاژ کرنے کی کوششوں کو ناکام بنانے کے لیے پرعزم ہیں اور ہمارے بہادر سپاہیوں کی ایسی قربانیاں ہمارے عزم کو مزید مضبوط کرتی ہیں۔

ترجمان پاک فوج کا کہنا ہے کہ  پاکستانی سرزمین پر کام کرنے والے بھارت اور اس کے پراکسیز کے مذموم عزائم کو بہادر سکیورٹی  فورسز، ایل ای اے اور پاکستان کی بہادر قوم انشااللہ شکست دے گی۔