ایک نیوز:وزیراعظم محمد شہباز شریف نے کہا ہے کہ  بجلی کی قیمتوں میں مزید کمی کیلئے  اصلاحات کا عمل جاری  رہے گا۔ 

تفصیلات کے مطابق وزیراعظم محمد شہباز شریف کی زیر صدارت میری ٹائم سیکٹر میں اصلاحات کے حوالے سے اجلاس  ہوا۔

اجلاس میں بریفنگ دی گئی کہ  اگلے دس سال کی ضروریات کو مد نظر رکھتے ہوئے نیشنل ڈریجنگ پلان تشکیل دیا گیا ہے، نیشنل ڈریجنگ پلان کے تحت تمام ملکی بندرگاہوں کی ڈریجنگ کے لیے نیشنل ڈریجنگ کمپنی بنائی جائے گی، اگلے 25 سال کی ضروریات کو مد نظر رکھتے ہوئے پاکستان نیشنل شپنگ کارپوریشن کی بحالی اور تعمیر نو کا لائحہ عمل بھی تیار کر لیا گیا ہے، پاکستان نیشنل شپنگ کارپوریشن میں پبلک پرائیویٹ پارٹنرشپ کے ذریعے نجی شعبے کو شامل کیا جائے گا۔

اجلاس میں کراچی پورٹ ٹرسٹ میں تربیت یافتہ افرادی قوت لانے کے لیے حکمت عملی پیش کی گئی ، ملکی بندرگاہوں کی کارکردگی کو بہتر بنانے کیلئے تمام بندرگاہوں کا فائنانشل، ایچ آر اور پرفارمینس آڈٹ کیا جائے گا، کیمیائی فضلا اور دیگر خطرناک مواد کو تلف کرنے کے لیے گڈانی میں پلانٹ قائم کیا جا رہا ہے، تمام بندرگاہوں پر یکساں اصول و ضوابط کے نفاذ کے لیے پاکستان میری ٹائم پورٹ ایکٹ حتمی مراحل میں ہے۔

وزیراعطم نے   کہا کہ  توانائی کے شعبے میں پائیدار اصلاحات کے لیے بنائی گئی ٹاسک فورس کی کاوشوں سے بجلی کے نرخوں میں حالیہ کمی ممکن ہوئی، شعبہ توانائی کے لیے تشکیل کردہ ٹاسک فورس کی طرز پر میری ٹائم سیکٹر میں پائیدار اصلاحات کے لیے ٹاسک فورس کام کر رہی ہے، سمندر سے جڑی اکانومی میں طویل عرصے سے موجود جمود کو ختم کرنے کے لیے اصلاحات پر کام تیزی سے جاری ہے، اللہ تعالیٰ نے پاکستان کو طویل ساحل، سمندر اور دیگر لامحدود وسائل عطا کیے ہیں۔

انہوں نے کہا  عالمی معیشت کی ترقی سمندری وسائل اور ان تک رسائی سے جڑی ہے، ملکی بندرگاہوں کو مسابقتی معیار پر لانے کے لیے تجارتی ٹیرف پر نظر ثانی کی جائے، وزیراعظم  نے  کسٹمز کلیئرنس کے عمل میں گرین چینل کی طرز پر تیزی لانے کے لیے ریڈ اور ییلو چینلز میں کلیئرنس کے دورانیے کو کم کرنے کے لیے لائحہ عمل تشکیل دینے کی ہدایت  کردی۔ 

وزیر اعظم  نے  بحری امور کی اصلاحات کے لیے بنائی گئی ٹاسک فورس کے اراکین اور دیگر سٹیک ہولررز کی پزیرائی  کی۔ 

انہوں نے کہا   کہ  بندرگاہوں پر موجود کنٹینروں کی موجودگی کے دورانیے کو کم سے کم کرنے کے لیے لائحہ عمل بنایا جائے، بندرگاہوں پر موجود نیلام ہونے والے کنٹینروں کو جلد از جلد نیلام  کیا جائے  ، تاکہ پورٹ پر موجود جگہ کا بہتر استعمال کیا جاسکے ، تمام بندرگاہوں پر جدید ترین سکینر لگانے کی رفتار کو تیز کیا جائے۔

محمد  شہباز شریف  نے مزید کہا کہ  میری ٹائم شعبے میں اصلاحات کیلئے ٹاسک فورس قائم کی گئی ، ٹاسک فورس نے میری ٹائم شعبے میں اصلاحات کیلئے سخت محنت کی، بجلی کی قیمتوں میں اوسطاً ساڑھے 7روپے کمی کی گئی ہے، یہ ایک بڑا ریلیف ہے جو گھریلو اورصنعتی صارفین کو فراہم کیا گیا ہے، بجلی کی قیمتوں میں مزید کمی کے لئے اصلاحات کا عمل جاری ہے، اللہ تعالیٰ کا شکر ہے کہ ہم نے میکرواکنامک استحکام حاصل کر لیا ہے،بجلی کی قیمتوں میں کمی سے پیداواری لاگت میں کمی  آئےگی۔

  اجلاس میں نائب وزیراعظم و وزیر خارجہ محمد اسحاق ڈار، چیف آف آرمی سٹاف جنرل سید عاصم منیر، وفاقی وزا خواجہ محمد آصف، احسن اقبال، اعظم نذیر تارڑ، احد خان چیمہ، جنید انور، وزیراعظم کے مشیر سید توقیر شاہ، گورنر سٹیٹ بینک اور متعلقہ اداروں کے اعلیٰ افسران شریک تھے۔