ایک نیوز: پی ایس ایل سیزن 10کے 26ویں میچ میں کوئٹہ گلیڈی ایٹرز نے اسلام آباد یونائیٹڈ کو 109رنز سے شکست دے دی ہے۔

تفصیلات کے مطابق راولپنڈی میں کھیلے گئے میچ  میں  اسلام آباد یونائیٹڈ نے ٹاس جیت کر پہلے فیلڈنگ کا فیصلہ کیا۔

کوئٹہ گلیڈی ایٹرز  نے پہلےکھیلتے ہوئے مقررہ 20 اوور میں 3 وکٹوں کے نقصان پر 263 رنز بنائے۔

کوئٹہ گلیڈی ایٹرز کی جانب سے بیٹر رائیلی روسو نے 6چھکے اور 13چوکےلگاکر 44گیندوں پر سنچری مکمل کی۔

واضح رہے کہ  پی ایس ایل میں رائیلی روسو کی یہ تیسری سنچری ہے، رائیلی روسو  پی ایس ایل میں سب سےزیادہ سنچریاں بنانے والے غیرملکی کھلاڑی بن گئے ہیں۔

حسن نواز نے 45 گیندوں پر ناقابل شکست 100 رنز بنائے،ان کی اننگز میں 9 چھکے اور 4 چوکے شامل تھے۔

اسلام آباد یونائیٹڈ کے  نسیم شاہ اور عماد وسیم نے ایک ،ایک وکٹ حاصل کی۔

264 رنز کے ہدف کے جواب میں اسلام آباد یونائیٹڈ کی ٹیم 19 اعشاریہ 3 اوورز میں 154 رنز پر ڈھیر ہوگئی۔

اسلام آباد یونائیٹڈ کے  عماد وسیم 56 اور  بین ڈوارشوئس 31 رنز بنا کر نمایاں رہے۔

کوئٹہ گلیڈی ایٹرز کے  محمد عامر نے 3، ابرار احمد اور فہیم اشرف نے 2،2 وکٹیں حاصل کیں۔

میچ سے قبل سٹیڈیم میں پاکستان کا قومی ترانہ بجایا گیا اور بھارتی حملوں کے نتیجے میں شہید ہونے والوں کی یاد میں ایک منٹ کی خاموشی بھی اختیار کی گئی۔