ایک نیوز: ایشیائی ترقیاتی بینک نے امریکی ٹیرف کے ایشیائی ممالک پر ممکنہ اثرات پر تجزیاتی رپورٹ جاری کر دی ہے۔

ایشیائی ترقیاتی بینک  کی رپورٹ میں کہا گیا ہے کہ  ترقی پذیر ایشیائی خطہ امریکی ٹیرف سے سب سے زیادہ متاثر ہوگا، ترقی پذیر ایشیائی خطے میں پاکستان امریکی ٹیرف کی زد میں آنے والا 14 واں بڑا ملک ہے،  جبکہ  جنوبی ایشیا خطے میں پاکستان امریکی ٹیرف کی فہرست میں تیسرے نمبر پر ہے۔  

رپورٹ میں کہا گیا ہے کہ  سری لنکا کی مصنوعات پر 44 فیصد، بنگلہ دیش پر 37 فیصد ٹیرف عائد کیا گیا، پاکستان پر امریکی انتظامیہ نے 29 فیصد ٹیرف عائد کیا ہے، بھارت 26 فیصد، افغانستان ، مالدیپ، نیپال اور بھوٹان پر شرح 10 فیصد عائد ہے،ترقی پزیر ایشیائی خطے میں سب سے زیادہ ٹیرف کمبوڈیا پر 49 فیصد عائد کیا گیا ہے،  سب سے زیادہ ٹیرف والے دنیا کے 10 ممالک میں سے 5 کا تعلق ایشیا سے ہے۔

 اے ڈی بی  کے مطابق  تانبہ، ادویات، سیمی کنڈکٹرز، لکڑی کی اشیاء کو اضافی ٹیرف سے مستثنی قرار دیا گیا ہے،  توانائی کی مصنوعات اور ادویات پر بھی اضافی امریکی ٹیرف لگنے کا خدشہ ہے،  یہ اضافی ٹیرف یا محصولات پہلے سے عائد کردہ ٹیکس کے علاوہ  ہوں گے ،  امریکی ٹیرف کا مقصد تجارتی خسارہ کم کرنا ہے۔