ویب ڈیسک:چین کی جانب سے امریکی درآمدی مصنوعات پر 84 فیصد تک ٹیرف عائد کرنے کا اعلان کردیا گیا ہے۔

چینی وزارت خزانہ کی جانب سے جاری  کردہ  بیان میں کہا گیا کہ یہ فیصلہ امریکی صدر ڈونلڈ ٹرمپ  نے  چینی مصنوعات پر 104 فیصد ٹیرف نافذ  کر نے  کے بعد کیا ہے۔

 دوسری جانب  چینی وزارت تجارت نے مزید 6 امریکی  کمپنیز  کو ’غیر معتبر اداروں کی فہرست‘ میں شامل کرلیا ہے جس سے ان کمپنیوں کیلئے  چین میں کاروبار کرنا مزید مشکل ہو جائے گا۔

 واضح رہے کہ  اس فہرست میں ایرو اسپیس اور ڈیفنس کمپنی ’سییرا نیواڈا کارپوریشن‘ سمیت مصنوعی ذہانت سے وابستہ دیگر امریکی کمپنیاں بھی شامل ہیں، اس سے قبل چین معروف فیشن برانڈز کی مالک کمپنی ’پی وی ایچ‘ کو بھی اس فہرست میں شامل کرچکا ہے۔

غیر معتبر اداروں کی فہرست  میں شامل کمپنیوں کو چین میں مالی جرمانوں اور ریگولیٹری پابندیوں سمیت دیگر پابندیوں کا سامنا کرنا پرسکتا ہے، جو ان کے کاروباری آپریشنز کو شدید متاثر کر سکتی ہیں۔

 یاد  رہے کہ گزشتہ ہفتے ڈونلڈ ٹرمپ نے چینی مصنوعات کی درآمد پر 34 فیصد ٹیرف عائد کیا تھا جس کے بعد  امریکا  میں چین مصنوعات کی درآمد پر مجموعی ٹیرف 54 فیصد ہوگیا تھا۔