ویب ڈیسک:ویسٹ جاپان ریلوے کمپنی نے صرف 6  گھنٹے کے دوران  ایک ریلوے سٹیشن تعمیر کر دیا۔

تفصیلات کے مطابق جاپانی ریلوے کمپنی نے یہ حیرت انگیز کام 3 ڈی پرنٹنگ سے ممکن بنایا، یہ دنیا کا پہلا 3 ڈی ریلوے اسٹیشن ہے جو جاپان کے علاقے  اریڈا میں تعمیر کیا گیا۔ 

واضح رہے کہ  اس جگہ 1948 سے لکڑی سے بنا ایک  سٹیشن موجود تھا جس کو 3 ڈی پرنٹڈ ریلوے سٹیشن سے  بدلا گیا ہے۔

نیا  ہاتسوشیما   سٹیشن روزانہ 530 مسافروں کی میزبانی کرتا ہے اور یہاں ہر گھنٹے  ایک سے 3 ٹرینیں گزرتی ہیں۔

اس سٹیشن کیلئے  3 ڈی پرنٹر سے مختلف حصوں کو تیار کیا گیا جن کو فیکٹری سے اریڈامنتقل کیا گیا، پرنٹنگ کے عمل میں 7 دن لگے اور جب ریلوے  سٹیشن کے مختلف حصوں کو مکمل کر دیا گیا تو انہیں 24 مارچ کی شب تعمیراتی مقام پر پہنچا دیا گیا۔

سیرینڈکس نامی کمپنی نے پرنٹنگ عمل کو مکمل کیا اور اس کے شریک بانی کونی  ہیرو ہانڈانے بتایا کہ روایتی طریقے سے ریلوے  سٹیشن کی تعمیر کافی سست روی سے ہوتی ہے اور یہ کام مشکل بھی ہوتا ہے۔

انہوں نے بتایا کہ روایتی طریقے سے تعمیر کو مکمل کرنے میں متعدد مہینے لگ جاتے ہیں مگر 3 ڈی پرنٹنگ نے تعمیراتی کام کو برق رفتار کر دیا۔

24مارچ کی شب 11 بج کر 57 منٹ پر جب آخری ٹرین سٹیشن سے گزر گئی تو ٹرک وہاں پہنچے اور مقامی افراد نے 3 ڈی پرنٹر سے تیار کردہ حصوں کو آپس میں جوڑ دیا۔

البتہ ابھی بھی یہ  سٹیشن مسافروں کیلئے  مکمل طور پر تیار نہیں، ٹکٹ مشینیں اور آئی ڈی کارڈ ریڈرز کی تنصیب باقی ہے۔

ریلوے کمپنی کا کہناہے کہ  3 ڈی پرنٹر کی بدولت تعمیراتی کام کے دورانیے میں کئی ماہ کی بچت ہوئی جبکہ یہ طریقہ کار روایتی طریقے سے دوگنا سستا ثابت ہوا۔