ایک نیوز:پاک فوج کے شعبہ تعلقات عامہ کے مطابق عزت مآب تھامس سوزی اور آنریبل جوناتھن جیکسن کے ہمراہ عزت مآب جیک برگمین کی قیادت میں امریکی کانگریس کے ایک وفد نے آج آرمی چیف جنرل سید عاصم منیر سے ملاقات کی۔
ملاقات میں علاقائی سیکیورٹی اور دفاعی تعاون پر تبادلہ خیال کیا گیا،پاکستان اور امریکا کے درمیان دیرپا شراکت داری پر زور دیا گیا،امریکی وفد کی دہشت گردی کے خلاف پاک فوج کے کردار کی تعریف کی گئی،پاکستان کے علاقائی امن و استحکام میں کردار کو سراہا گیا ،امریکی وفد نے پاکستان کی خودمختاری کے احترام کا اعادہ کیا، سیکیورٹی، تجارت، سرمایہ کاری اور معاشی ترقی پر تعاون بڑھانے پر اتفاق کیا گیا۔
آئی ٹی کے شعبے میں تربیتی تعاون سے متعلق مفاہمتی یادداشتوں پر دستخط ہوئے،جنرل عاصم منیرنے وفد کو دورے پر شکریہ اور تعاون بڑھانے کی خواہش کا اظہارکیا ، ملاقات کے دوران باہمی دلچسپی کے متعدد امور پر تبادلہ خیال بھی کیا گیا، خاص طور پر علاقائی سلامتی اور دفاعی تعاون پر زور دیا گیا۔
دونوں فریقوں نے باہمی احترام، مشترکہ اقدار اور تزویراتی مفادات کو یکجا کرنے پر مبنی پائیدار مصروفیت کی اہمیت کا اعادہ کیا، دورے پر آئے ہوئے امریکی قانون سازوں نے دہشت گردی کے خلاف جنگ میں اہم کردار ادا کرنے پر پاکستان کی مسلح افواج کی تعریف کی اور علاقائی امن و استحکام کے لیے پاکستان کی لازوال خدمات کا اعتراف کیا۔
انہوں نے پاکستان کی لچک اور اس کے عوام کی تزویراتی صلاحیت کی بھی گہری تعریف کی، پاکستان کی خودمختاری کے لیے اپنے احترام کو اجاگر کرتے ہوئے امریکی کانگریس کے وفد نے وسیع البنیاد دوطرفہ تعاون بالخصوص سلامتی، تجارت، سرمایہ کاری اور اقتصادی ترقی کے شعبوں میں آگے بڑھانے کے لیے مضبوط عزم کا اظہار کیا۔
جنرل سید عاصم منیر نے وفد کو ان کے دورے پر خراج تحسین پیش کیا اور پاکستان کی امریکہ کے ساتھ اپنی دیرینہ شراکت داری کو مزید گہرا اور متنوع بنانے کی خواہش کا اعادہ کیا جو باہمی طور پر فائدہ مند اور ایک دوسرے کے قومی مفادات کا احترام کرے۔
ملاقات کے دوران انفارمیشن ٹیکنالوجی کے شعبے میں تربیتی تعاون کے لیے مفاہمت کی یادداشتوں پر بھی دستخط کیے گئے۔
