ایک نیوز:پاک بھارت جنگ بندی کے بعد شہری پاک فوج سے اظہار محبت کیلئے سڑکوں پر نکل آئے۔
تفصیلات کے مطابق پاک بھارت جنگ بندی کے بعد پاکستان کی جیت کا جشن منانے کیلئے ملک کے مختلف علاقوں کے شہری سڑکوں پر نکل آئے ہیں،شہریوں نے ہاتھوں میں پاکستانی پرچم اٹھا رکھے تھے اور پاکستان زندہ باد، پاک فوج زندہ باد کے نعرے لگا رہے تھے۔
شہریوں کی جانب سے بھارت کے خلاف ’’مردہ باد ‘‘کے نعرے لگا ئے گئے۔
شہریوں نے اپنے جذبات کا اظہار کرتے ہوئے کہا پاکستان نے بھارت کو منہ توڑ جواب دیا ،بھارت کو سمجھا دیا گیا کہ جنگ کوئی مذاق نہیں ہے لیکن مودی یہ چاہتا تھا۔
اس دوران زیرو لائن سے ملحقہ دیہات کے مکین بھی خوشی سے جھومتے نظر آئے ، انہوں نے کہا کہ پاک فوج نے دن دیہاڑے بھارت کو منہ توڑ جواب دیا ، جس کے باعث اسے آج سیز فائر کروانے کیلئے امریکہ کے پاؤں پکڑنا پڑے۔
دوسری جانب لاہوریوں نے پاکستان سے اظہار محبت کرتے ہوئے کہا کہ آج مودی کا غرور خاک میں مل گیا ، آج ثابت ہوگیا کہ بھارت اور اس کی عوام صرف بھڑکیں ہی مار سکتی ہے ، اب بھارتی عوام اور انڈین گودی میڈیا پاکستان کے خلاف ہرزہ سرائی کرنے سے پہلے دس بار سوچیں گے۔
شہریوں نے کہا کہ ان کے حوصلے بلند ہیں اور ہم ملک کے لیے کسی بھی قربانی سے دریغ نہیں کریں گے اور خدمت جاری رکھیں گے۔
واضح رہے کہ بھارت نے گزشتہ چند روز قبل پاکستان کے ساتھ جنگ کا آغاز کرتے ہوئے مختلف شہروں پر گولہ بھاری کی، اس کے علاوہ دشمن کی جانب سے شہری آبادیو ں پر ڈرونز گرائے گئے، اور ایل او سی پر فائرنگ کا سلسلہ بھی جاری رکھا، جس کے باعث پاکستان کے تقریبا32 شہری شہید جبکہ متعدد زخمی بھی ہوئے۔
پاکستان کی جانب سے بھارت کو بار ہا مرتبہ باور کرایا کہ وہ اس طرح کی اشتعال انگیزی سے باز رہے، لیکن وہ اپنے رافیل طیاروں کے گھمنڈ سے باہر نہ نکل سکا،بھارت کا گودی میڈیا اپنے چینلز پر جھوٹ اور سنسنی پھیلاتا رہا۔
دوسری جانب پاک فوج کی جانب سے بھارت کی ہر جارحیت کا بھر پور جواب دیا گیا ، پاک فوج نے دشمن کے مختلف پوسٹس اور بیسز کو تباہ کیا ، آج ’’صبح آپریشن بنیان مرصوص ‘‘کا آغاز ہوتے ہی پاکستان کے مزائیلوں نے دشمن کے موروچوں کو تباہ و بربادکردیا، مزائل داغے جانے سے بھارتی کے حواس باختہ ہوئے اورمجبوراً اسے شکست تسلیم کرتے ہوئے سیز فائر کی جانب جانا پڑا۔
