ایک نیوز:چیئرمین پی سی بی محسن نقوی کی جانب سے آئی سی سی ویمنز کوالیفائر کی6کرکٹ ٹیمزکی کھلاڑیوں اور آفیشلز کے اعزاز میں شاہی قلعہ میں تقریب کا انعقاد کیا گیا۔
پی سی بی کی جانب سے آئی سی سی ویمنز کرکٹ ورلڈ کپ کوالیفائر میں شرکت کرنے والی تمام ٹیمز اور آفیشلز کے اعزاز میں شاہی قلعہ میں شاندار تقریب کا انعقاد کیا گیا ،شاہی قلعہ کی تقریب میں میزبان پاکستان، بنگلہ دیش، ویسٹ انڈیز، آئرلینڈ، سکاٹ لینڈ اور تھائی لینڈ کی خواتین کھلاڑیوں ، کوچنگ و مینجمنٹ سٹاف نے شرکت کی ۔
چیئرمین پی سی بی محسن نقوی نے شاہی قلعہ کے عالمگیری دروازے پر تمام ٹیموں کی کھلاڑیوں اور آفیشلز کو خوش آمدید کہا،چیئرمین پی سی بی محسن نقوی سے کھلاڑیوں اور آفیشلز کا تعارف کرایا گیا،محسن نقوی نے تمام ٹیموں کے لئے نیک تمناؤں کا اظہار کیا،عالمگیری گیٹ پر تمام ٹیموں کی کھلاڑیوں اور آفیشلز کا چیئرمین پی سی بی محسن نقوی کے ساتھ گروپ فوٹو بنایا گیا ۔

یہ بھی پڑھیں : ویمن ورلڈ کپ کوالیفائر:سکاٹ لینڈ فاتح، تھائی لینڈ کو 58رنز سے شکست

 محسن نقوی کا کہنا تھا کہ پاکستان آنے والی تمام ٹیموں کا زندہ دلان لاہور میں خیرمقدم کرتے ہیں اور آپ سب ہمارے خصوصی مہمان ہیں، پاکستان پر امن، محفوظ اور کرکٹ کے کھیل سے محبت کرنے والا ملک ہے، امید ہے کہ زندہ دلوں کے شہر میں آپ کا قیام خوشگوار اور یادگار رہے گا،میچ ریفریز، ایمپائرز اور دیگر آفیشلز بھی تقریب میں شریک ہوئے ۔
غیر ملکی خواتین کھلاڑیوں و میچ آفیشلز کو شاہی قلعہ، بادشاہی مسجد،مزار اقبال اور حضوری باغ کی سیر کرائی گئی ،غیر ملکی خواتین کھلاڑیوں نے رنگیلا رکشہ کی سواری کو بہت انجوائے کیا، ڈھولیچی گروپ کی شاندار پرفارمنس نے سماں باندھ دیا۔
 غیر ملکی پلئیرز بھی دھمال ڈالتی رہیں دیوان خاص میں مغلیہ دور کے لباس میں ملبوس کینزاوں نے غیر ملکی مہمانوں کا استقبال کیا اورفرشی آداب بجا لائیں، بادشاہ سلامت کی آمد کے بعد کتھک رقص کا بہترین مظاہرہ کیا گیا، غیر ملکی مہمان بہت محظوظ ہوئے،بھرپور داد دی بانسری کی مدھر دھنوں نے ویمنز پلیئرز پر سحر کر دیا ۔

یہ بھی پڑھیں : پی ایس ایل ٹین :کوئٹہ گلیڈی ایٹرز کیخلاف قلندرز کی بیٹنگ جاری

خواتین کھلاڑیوں اور آفیشلز کو دیوان عام، بارود خانہ، شیش محل کی بھی سیر کرائی گئی اورشاہی قلعہ کی تاریخ کے بارے آگاہ کیا گیا ،غیر ملکی کھلاڑیوں اور میچ آفیشلز نے شاہی قلعہ کی تاریخی حیثیت میں گہری دلچسپی کا اظہار کیا،غیر ملکی مہمانوں کے اعزاز میں عشائیہ کا بھی اہتمام کیا گیا۔
 غیر ملکی ویمنز پلئیرزکا کہنا تھا کہ پی سی بی کا بہت شکریہ، تقریب یادگار تھی، تاریخی مقامات دیکھ کر خوشی ہوئی، لاہور سے خوشگوار یادیں لے کر جائیں گے،بہت انجوائے کیا،پہلی بار ایسی ناقابل فراموش تقریب دیکھی۔
اس موقع پر غیر ملکی میچ آفیشلز امریکی قونصل جنرل کرسٹن کے ہاکنز ، چیف آپریٹنگ آفیسر پی سی بی سمیر احمد، چیف فنانشل آفیسر جاوید مرتضی، ہیڈ آف ویمنز کرکٹ رافعہ حیدر، ڈائریکٹر انٹرنیشنل کرکٹ عثمان واہلہ، ڈائریکٹر ڈومیسٹک کرکٹ عبداللہ خرم نیازی، ڈائریکٹر ایچ آر فیصل ملک اور اعلی حکام بھی موجود تھے۔