ایک نیوز: وزیراعظم محمد  شہباز شریف نے کہا ہے کہ  بجلی کی قیمتوں میں کمی کرکے عوام کو ہر ممکن ریلیف دیا گیا، عالمی منڈی میں تیل کی قیمتوں میں کمی کا فائدہ  بھی عوام کو منتقل کریں گے۔

 تفصیلات کے مطابق وزیراعظم محمد شہباز شریف کی زیر صدارت وفاقی کابینہ کا اجلاس آج وزیراعظم آفس، اسلام آباد میں منعقد ہوا،اجلاس کا اعلامیہ جاری کردیا گیا۔

 اجلاس کے شرکاء سے خطاب کرتے ہوئے وزیراعظم نے اعلان کیا کہ بین الاقوامی مارکیٹ میں پیٹرولیم مصنوعات کی قیمتوں میں ہونے والی کمی کو صارفین تک منتقل کرنے کی بجائے اس رقم کو بلوچستان کی سب اہم شاہراہ N- 25 (چمن ،کوئٹہ،قلات ،خضدار، کراچی شاہراہ) کو دو رویہ کرنے میں استعمال کیا جائے گا تاکہ بلوچستان کے عوام کو سفر کی بہترین سہولیات میسر آسکیں۔

وزیراعظم نے ہدایت کی کہ قومی شاہراہ کی بحالی موٹر وے کے معیار پر کی جائے۔

مزید برآں اسی بچت سے کچھی کینال کا فیز 2 بھی مکمل کرنے میں استعمال ہو گی ،جس سے صوبہ بلوچستان کی سینکڑوں ایکڑ زمین سیراب ہو گی اور صوبے سمیت پاکستان بھر میں خوشحالی آئے گی۔

وزیر اعلیٰ سرفراز بگٹی نے بلوچستان کے عوام کے لئے این 25 کی بحالی کے منصوبے اور دیگر ترقیاتی منصوبوں کے لیے وزیراعظم کا شکریہ ادا کیا۔

وفاقی کابینہ نے پیٹرولیم ڈویژن کی سفارش پر پیٹرولیم پراڈکٹس (پیٹرولیم لیوی)  آرڈیننس  1961 میں ترمیم کی منظوری دے دی، اس ترمیم میں قومی محصولات میں اضافہ ہو گا۔

وفاقی کابینہ نے وزارت خزانہ کی سفارش پر حکومت کی ڈومیسٹک  سکیورٹیز جاری کرنے کے حوالے سے سسٹین ایبل انوسٹمینٹ سکوک فریم ورک کی منظوری دے دی۔

یہ فریم ورک مقامی طور پر پائیدار سرمایہ کاری کے لئے سکوک جاری کرنے کے حوالے مددگار ثابت ہو گا ،جس کے تحت پائیدار ماحولیات اور قابل تجدید توانائی کے حوالے سے منصوبوں کی فنڈنگ کی جا سکے گی۔

 یہ فریم ورک پائیدار ترقیاتی اہداف ، نیشنلی ڈٹرمنڈ کانٹری بیوشنز  اور قومی ایڈیپٹیشن پلان 2023 کی تکمیل میں اہم سنگ میل ثابت ہو گا۔

وفاقی کابینہ نے وزارت قومی غذائی تحفظ و تحقیق کی سفارش پر نیشنل ایگری ٹریڈ اینڈ فوڈ سیفٹی اتھارٹی کے قیام کے حوالے سے بل کو پارلیمینٹ بھیجنے کی منظوری دے دی۔

اس موقع پر  وزیراعظم شہباز شریف نے   اجلاس سے خطاب  بھی کیا۔

 وزیر اعظم شہباز شریف  نے اپنے خطاب میں کہا کہ صدر مملکت کی بہتر صحت کے لئے دعاگو ہیں۔

ایران میں 8 پاکستانی مزدوروں  کے قتل  کی مذمت کرتے ہوئے وزیراعظم نے کہا  کہ ایران میں8بے گناہ پاکستانیوں کو شہید کر دیا گیا، اس واقعہ کی جتنی بھی مذمت کی جائے کم ہے،ایران حکومت قاتلوں کو گرفتار کرکے قرار واقعی سزا دے۔

انہوں نے  کہا  کہ  بجلی کی قیمتوں میں ساڑھے7روپے کی ریکارڈ کمی کی، بجلی کی قیمتوں میں کمی سے گھریلو،صنعتی صارفین کو فائدہ ہوگا، بجلی کی قیمتوں میں کمی کرکے عوام کو ہر ممکن ریلیف دیا گیا،عالمی منڈی میں تیل کی قیمتوں میں کمی کا فائدہ عوام کو منتقل کریں گے۔

محمد شہباز شریف نے کہا سکھر،حیدرآباد،کراچی موٹروے کو مکمل کریں گے، بلوچستان میں ٹیوب ویلز کو شمسی توانائی پر منتقل کر رہے ہیں، عالمی معیار کی کوئٹہ،خضدار اورقلات روڈ تعمیر کی جائے گی، این25منصوبہ2سال میں300ارب روپے کی لاگت سے مکمل کیا جائے گا، بلوچستان خوشحال ہوگا تو پاکستان خوشحال ہوگا، کھچی کینال کا دوسرا مرحلہ بھی تیزی سے مکمل کیا جائے گا۔

وزیراعلیٰ بلوچستان سرفراز بگٹی نے وزریر اعظم کو یقین دہانی کراتے ہوئے کہا کہ منصوبے کی تکمیل کے لئے بھرپور تعاون کریں گے۔